In sas dies coladas, in presèntzia de s’assessora a s’Ambiente Maria Bonària Zedda e de su coordinadore de su CEAS (Centro di Educatzione Ambientale e Sostenibilità) de Aristanis Antonio Ricciu, sos pitzinnos ant prantadu in sos giardinos de sas iscolas sos abetes chi sas iscolas aiant retzidu pro Nadale.
“In sas dies de Nadale impreamus àrbores meda chi, una borta finidas sas festas, si nche fùlliant a s’arga – ispiegat s’assessora Zedda -. Est un’isperdìtziu mannu de resursas e faghet dannu a s’ambiente. Pro custa resone amus pensadu de organizare una manifestatzione pro torrare a prantare in su giardinu de s’iscola sas àrbores impreadas pro Nadale. In custa manera, sas àrbores de Nadale non si nche fùlliant ma si faghent parte de su paesàgiu iscolàsticu e unu sìmbulu de sa cura nostra pro s’ambiente”.
“Cherimus chi custa proposta siat un’ocasione pro educare sos pitzinnos a amparare s’ambiente e a sa responsabilidade a cara a su pianeta nostru – sighit s’assessore a s’Istrutzione Pùblica Luca Faedda -. Semus seguros chi, gràtzias a s’agiudu de sos istudiantes chi ant partetzipadu a s’idea cun entusiasmu mannu, podimus megiorare unu pagu su mundu”.
Su progetu, promòvidu dae s’Assessoradu a s’Ambiente e curadu dae su CEAS, est nàschidu pro fàghere promotzione a sos temas de sa sustenibilidade ambientale. Ant comintzadu regalende sas àrbores de Nadale a sos istitutos cumprensivos de sas iscolas primàrias e segundàrias de primu gradu, a su Tzentru de Igiene Mentale de sa ASL e a sa Domo Tzircondariale Salvatore Soro. Custas àrbores sunt istadas decoradas sighende sa lògica de su recùperu de sos materiales.
A primos de annu, passadas sas festas, sos operadores de su CEAS ant agiuadu a sos alunnos a prantare sas àrbores in sos giardinos de sas iscolas.
“Est istada un’initziativa chi totus podent cumprèndere, unu signale forte pro sas generatziones noas – cummentat Antonio Ricciu, responsàbile de su CEAS -. Cherìamus fàghere cumprèndere s’importàntzia chi tenent sas àrbores in sas tzitades ca produint ossìgenu, agiuant a minimare su gas serra chi dae semper est unu problema mannu pro sas tzitades e donant una calidade de vida prus bella a sa gente”.
(GF.P.)
