S’Unidade operativa de Oncologia-Ematologia de s’ispidale Santu Martinu de Aristanis, su diretore est dot. Luigi Curreli, sas dies passadas at torradu abèrrere sas prenotatziones pro sas primas vìsitas oncoematològicas cun prioridade urgente, chi si podent prenotare cun su Cup a sos nùmeros 1533 dae sa rete fissa o 0783 317293 dae su telefoneddu, chi sunt operativos dae su lunis a sa chenàbura dae sas 8.00 a sas 18.00.
Gràtzias a s’assuntzione de un’ispetzialista nou, como sunt tres sos ematòlogos in servìtziu, si est pòdidu torrare a incomintzare s’atividade dedicada a sos malàidos noos e fintzas a tzirriare sos chi teniant sa vìsita suspèndida e chi depent ispetare de èssere tzirriados dae su Cup de sa ASL pro sa data noa sentza si torrare a prenotare.
Pro coitare cun sas vìsitas chi sunt suspèndidas, su servìtziu at postu in contu sete vìsitas de recùperu a sa die.
Dae su mese de cabudanni, a pustis de àere s’assuntu àteros oncòlogos, in s’ispidale de Santu Martinu, faghent prus vìsitas a sa chida e dae su Cup sunt tzirriende a sos malàidos pro su controllu. Como totu sas vìsitas de controllu suspèndidas sunt istada recuperadas.
Pro s’oncologia sa Asl de Aristanis est traballende pro sa preventzione, sos controllos oncològicos, sos servìtzios e sas terapias oncològicas e pro afortiare s’orgànicu.
(MM)
