Torrant in Sèdilo Zenias de atonzu e Ichnos cun unu programma prenu de initziativas de cada genia pro imparare, connòschere e s’ispassiare.
Unu muntone de atividades culturales, de isport, de mùsica e fintzas de solidariedade pro avalorare su patrimòniu culturale, identitàriu e enogastronòmicu:
- Cun bìsitas guidadas s’ant a pòdere visitare su Parcu archeològicu de Iloi, su Museu de su Territòriu e sa crèsia de santu Antine e fàghere escursiones in su Lagu Omodeo;
- Sos pipios ant a pòdere partetzipare a unos cantos laboratòrios, unu est pro imparare comente si faghent sos giogos antigos;
- Ant a èssere presentados libros e mustras in contu de s’artesanadu e sas traditziones sedilesas;
- No ant a mancare atividades cun sos caddos (pàliu, parìllias, …), unu torneu de pallavolo, s’ocasione de sètzere in kayak e in go-kart e, cun unu pilota abilitadu, chie cheret at a pòdere bolare cun unu parapendio a duos postos;
- In prus de unu laboratòriu s’at a mustrare comente si cuncordant màndigos de sa traditzione sedilesa chi s’ant a pòdere fintzas assagiare e osservare su traballu e sos traballos de sos artesanos (a incuru de sa Pro Loco);
- s’at a pòdere donare su sàmbene e regòllere ofertas pro sos ispidales pediàtricos italianos.
Sas carreras ant a èssere animadas dae s’ite fàghere mannu de sos sedilesos, sos mannos e sos piticos cun sas iscolas, dae una cummèdia peri sa bidda e sa mùsica de Ichnos – Sonos de solidariedade, chi at a incomintzare cun unu cunvegnu dedicadu a ite si podet e depent fàghere pro sas biddas chi tenent semper prus paga gente, prus pagu abitantes.
Sos artistas chi ant a partetzipare ocannu ant a èssere:
sàbadu 08 de santugaine: Maria Luisa Congiu, Laura Spano, Duo Doppio Diesis, Cuncordu Sas Bator Colonnas de Iscanu, Roberto Tangianu, Carlo Crisponi, Peppino Bande e Rockfellers;
domìniga 09 de santugaine: Inghìrios de Ballu, Su Cuntzertu de Abbasanta, Armonia Sarda e Piero Marras chi at a fintzas dare su Prèmiu solidariedade 2022 a Paolo Fresu.
(MM)
