Logo della Provincia di Oristano

Provincia di Oristano - sito web ufficiale

100 partetzipantes e 20 cuintales de arga regorta in sa die ecològica de Turremanna

10/05/2022  - 

A sa die ecològica fata in Turremanna s’8 de maju cun initziativa de s’Assessoradu a s’Ambiente de su Comune de Aristanis e de Fòrmula Ambiente b’at partetzipadu 100 voluntàrios, chi nd’ant regortu 20 cuintales de arga.

Sa regorta at interessadu sos oros de mare, sa pineta a cara a su Tennis Club, su segundu e su de tres pontiles e su portigheddu a cara a su Tzìrculu Nàuticu e at bogadu a campu arga de onni tipu, dae sos pneumàticos a sas ampullas e a sas tzicas de sigareta. Ma sa cosa prus istrana, ocannu, est istadu unu lavandinu agatadu mesu interradu a curtzu de su primu pontile.

Sa die est comintzada a sas 8 e mesa de mangianu, cando sos voluntàrios sunt imbàtidos a sa pratza de sa turre e, a s’iscritzione, ant retzidu una malliedda e un’ampulla ecològica peròmine, in prus de guantes e bustas pro pònnere s’arga.

In mesu de sos partetzipantes bi fiat s’assessore a s’Ambiente Gianfranco Licheri e paritzos amministradores comunales.

Un’agiudu mannu l’ant dadu sos pitzocos de sa Consulta Giòvanos, chi si sunt ocupados de sa parte logìstica. In mesu de sos voluntàrios, sos giòvanos de su Tzìrculu Nàuticu, sa cooperativa sotziale Sea Scout e tantos residentes de Turremanna, finas pitzinnos. Su Ceas Aristanis at aprontadu unu laboratòriu de educatzione ambientale pro fàghere a cumprèndere s’importàntzia de su recùperu creativu e de sa regorta diferentziada. L’Orto di Eleonora at aprontadu unu gazebo pro dare  a totus fràgula e melone.

A ùrtimu, s’est fata s’estratzione de sos prèmios, tres bitzicletas e chimbe bonos de ispesa regalados dae Spazio Conad.

(GF.P.)