S’Assessoradu a s’Ambiente de su Comune de Aristanis pedit s’agiudu de sos aristanesos pro sa die ecològica, chi ocannu s’at a fàghere s’8 de maju in marina de Turremanna.
S’initziativa est aparitzada dae su Comune de Aristanis e dae sa dita Formula Ambiente chi tenet s’apaltu de su servìtziu de igiene urbana.
“In custos 5 annos de amministratzione, s’ambiente est istadu unu tema prioritàriu – narat su sìndigu Andrea Lutzu -. Chie at in coro sas sortes de sa marina, domìniga nos podet agiuare a l’innetare. Nos isetamus chi s’iscriat gente meda comente ocannu passadu, chi b’ant partetzipadu 200 persones e nd’ant regortu 30 cuintales de arga”.
“Ocannu nos isetamus chi partètzipet gente meda, contende chi amus detzìdidu de antetzipare sa die ecològica de unu mese pro evitare su tropu caldu” agiunghet s’assessore a s’Ambiente Gianfranco Licheri.
Sa regorta s’at a fàghere in paritzos logos de sa bidda: a curtzu a su portu turìsticu, in sa praja e in pineta. Sos partetzipantes devent atopare a pratza de sa Turre a sas 8 e mesa de mangianu. Chie at a imbàtere prus a tardu s’at a pòdere iscrìere su matessi e dare su contributu suo. A fine de mangianu b’at a àere in prèmiu tres bitzicletas e unos cantos bonos de ispesa dados dae Spazio Conad de Aristanis. Formula Ambiente at a pònnere a disponimentu de sos primos 100 partetzipantes unu kit pro sa regorta: malliedda, guantes, ampulla e bustas. Pro sos prus piticos, pro onni bustighedda de tzicas de sigareta chi regollent, ant a tènnere in donu unu geladu.
Sa die ecològica at a finire a ora de mesudie e mesu (h 12,30). Est importante meda s’agiudu chi ant a dare sos assòtzios chi partètzipant: sa Consulta de sos Giòvanos s’at a curare de retzire sos voluntàrios e at a partetzipare a sa regorta; su Ceas Aristanis at a fàghere unu laboratòriu de recùperu creativu cun sa plàstica regorta in praja sos annos colados e una gara de regorta de tzicas de sigareta in sa praja; sa cooperativa sotziale Sea Scout at a mustrare comente s’impreat su defibrilladore e comente si faghent sas manovras pro sarvare sa vida; s’Ortu de Lionora at a fàghere unu padillione pro regalare fruta a chie partètzipat.
(GF.P.)
