Logo della Provincia di Oristano

Provincia di Oristano - sito web ufficiale

Emergèntzia ucraina - Su Comune de Aristanis est chirchende logos pro ospitare a sos pròfugos

11/03/2022  - 

Su Comune de Aristanis est chirchende istruturas pro acòllere sos pròfugos ucrainos.

Cun un’avisu pùblicu, aunende·si a sa rete de ospitalidade comente previdet una tzirculare de sa Prefetura de Aristanis, su Comune invitat a totu sos tzitadinos a signalare a sa mail urp@comune.oristano.it si tenent disponibilidade de logos in ue los ospitare.

“Tenende contu de s’emergèntzia umanitària grave meda de s’Ucraina, sa chirca est urgente. – ponet in evidèntzia su sìndigu Andrea Lutzu – In custas dies in Ucraina est in òpera una tragèdia chi non nos podet lassare indiferentes e semus totus cramados a fàghere sa parte nostra pro agiuare a custos frades de cussa terra turmentada dae sa gherra”.

S’invitu est pro totus: tzitadinos, istitutziones, assòtzios o entes religiosos.

Chie si siat chi tèngiat disponibilidade de locales adatos a retzire e a ospitare gente, màssimu fèminas e pitzinnos, e los cherent pònnere a disponimentu de su progetu, lu podent fàghere signalende sa disponibilidade de s’immòbile a s’Ufìtziu Relatziones cun su Pùblicu de su Comune de Aristanis – Anna Maria Carta (0783-791337), Giuliana Sordi (0783-791331) o a su nùmeru gratùitu 800652467.

Su Comune, in s’isetu de àteras informatziones operativas dae sos òrganos cumpetentes, est a disponimentu de sos tzitadinos pro cale si siat crarimentu.

(GF.P.)