Logo della Provincia di Oristano

Provincia di Oristano - sito web ufficiale

Lunis sa protesta de sos camionistas in su portu de Aristanis

11/03/2022  - 

A pustis de s’assemblea fata in Tramatza, sos camionistas sardos ant detzìdidu de si firmare lunis 14 martzu, blochende portos e istradas in totu sa Sardigna pro protestare ca su gasòliu est incaridu meda.

Sos rapresentantes de Unatras (s’unione de sos assòtzios natzionales prus rapresentativos de custu setore) martis 15 de martzu ant a andare a Palazzo Chigi pro faeddare cun una delegatzione de su Guvernu e cun sa vitze-ministra Teresa Bellanova.

A Unatras b’apartenent sas siglas Confartigianato Trasporti, Fai Conftrasporto, Fiap, Fita Cna, Sna Casartigiani, Unitai, Lega de sas Cooperativas e Confcooperativas.

Lunis mangianu chitzo unos chentu camionistas ant a blocare su portu e sa zona industriale de Aristanis. “Non faghet prus a andare a in antis gosi.” – cummentat Massimiliano Serra, unu de sos organizadores de s’assemblea de Tramatza “Nois non cherimus paralizare s’Ìsula, ma est giustu chi sa gente iscat chi gosi non faghet prus a traballare ca in prus de su gasòliu incaridu bi sunt sos prètzios de su trasportu in mare, sas ispesas pro tènnere contu sos mezos, sas pro cambiare sas gommas...”

Sa protesta est fata pro chi totus iscant custas cosas, e sos camionistas isetant rispostas dae sa Regione.

(GF.P.)