Logo della Provincia di Oristano

Provincia di Oristano - sito web ufficiale

Mont’e Prama, cuncursu pro sas iscolas

01/04/2022  - 

Sa Fundatzione Mont’e Prama at bandidu unu cuncursu pro sas iscolas de sa Provìntzia, cherende fàghere connòschere mègius su patrimòniu archeològicu de su territòriu de Crabas.

Sa Fundatzione tenet in intentu de educare sos giòvanos a tènnere contu e a amparare su patrimòniu culturale, chi podet èssere una risorsa manna pro su benidore issoro.

“Creimus chi sos giòvanos potzant èssere su fundamentu de s’atzione de sa Fundatzione ca su chi su tempus passadu nos at regaladu, nois l’amus a lassare a issos” at naradu Graziella Pinna de su Cussìgiu de Amministratzione de sa Fundatzione.

Su cuncursu previdet chi sos istudiantes chi bi partètzipant (a sa sola o in grupos de classe) istùdient bene s’istòria de su territòriu faghende chirca e anàlisi. A pustis de sa parte teòrica s’at a passare a cussa pràtica contestualizende sas informatziones e ponende in evidèntzia sos aspetos istòricos e artìsticos e elaborende una proposta pro dare valore a su situ, o proponende ideas pro chi cussos benes siant impreados mègius.

Pro partetzipare a su cuncursu tocat a mandare s’elaboradu paris cun s’ischeda de iscritzione intro de su 5 de abrile 2022 a s’indiritzu: Fondazione Mont’e Prama c/o Museo Civico G. Marongiu – 09072 Cabras”. In sa busta bi cheret iscritu su nùmene de su cuncursu: “Mont’e Prama, scussorgiu ‘e memoria – Mont’e Prama, tesoro della memoria”.

Pro nd’ischire de prus si podet iscarrigare su bandu dae su link https://www.comune.cabras.or.it/sites/default/files/documenti-uffici/CONCORSO%20FONDAZIONE%20MONTE%20PRAMA.pdf.

(GF.P.)