Logo della Provincia di Oristano

Provincia di Oristano - sito web ufficiale

Mundiale giovanile de Kiteboarding – Sas natzionales  in Turremanna

06/05/2022  - 

Dae su 16 a su 22 de maju Turremanna at a ospitare sos atletas de sas natzionales chi ant a partetzipare a su Mundiale giovanile de Kiteboarding (un’isport vèlicu chi impreat su surf e un’acuilone). Sa manifestatzione si narat “Formula Kite Youth World Championship 2022” e s’at a fàghere in Turremanna dae su 16 a su 22 de maju.

In Turremanna bi sunt giai sos atletas de Itàlia, Singapore, Tzina, Repùblica Tzeca, Taiwan e Croàzia e onni die faghent s’allenamentu pro si preparare a s’eventu isportivu.

Sas categorias in abba ant a èssere cussas Under 21, 17 e 15 e sos atletas devent sighire su matessi regulamentu de sas Olimpìades de Parigi 2024.

Paris cun s’ispetàculu isportivu, chi benit a pustis de su Mundiale de su mese de santugaine 2021, s’ant a fàghere sos eventos segundàrios cullegados a su mare, a sa sustenibilidade ambientale, a sa cultura cun su KiteFoil Fest (sos kite foil sunt acuilones chi non tenent istrutura tètera) e in oros de mare at a nàschere unu “villàgiu” dedicadu a isport e enogastronomia.

Pro presentare su “Formula Kite Youth World Championship 2022”, organizadu cun s’agiudu de su Comune de Aristanis e de sa Fundatzione Aristanis, s’at a fàghere un’atopu cun sos giornalistas giòbia 12 de maju 2022 a sas 11 in Eolo Beach Sports in Turremanna. Chie est interessadu podet partetzipare.

(GF.P.)