Logo della Provincia di Oristano

Provincia di Oristano - sito web ufficiale

Presentada de sa publicatzione Postale de sa Limba Sarda

28/06/2011  - 

Sa die 29 de làmpadas 2011, a sas 10,30 in sa sala de su Consìgiu Provintziale, carrela Enrico Carboni in Aristanis, at a èssere presentada sa publicatzione "Postale de sa limba sarda", una regorta de sos materiales didàticos e formativos de su progetu chi, in custos ùrtimos annos, est lòmpidu a sas biddas de sa Provìntzia.

Su Postale de sa limba sarda faghet parte de sas atividades formativas e culturales de su progetu "Limba sarda: limba de s’identidade, limba de su mundu", finantziadu dae sa Presidèntzia de su Consìgiu de sos Ministros – Dipartimentu pro sos Afàrios Regionales, cunforma a sa Lege di tutela delle minoranze linguistiche storiche. Est unu postale mudadu in àula didàtica cun materiales subra sas minorias linguìsticas, su bilinguismu, sa limba sarda e s'istòria de sa Sardigna, chi in sos meses colados at visitadu prus de 40 iscolas e est arribadu a sos Comunes chi faghent parte de su progetu de s’annualidade 2007, atobiende dipendentes pùblicos, amministradores, istudentes e tzitadinos.

Sa publicatzione, at a èssere dada a sas Iscolas e a sos istudentes, a sos Comunes e a sos dipendentes, at a lòmpere a su prus de sas famìllias e de sos tzitadinos de sa Provìntzia de Aristanis, faghende un’atzione de profetu mannu a favore de sa limba sarda.

A sa presentada ant a interbènnere su Presidente de sa Provìntzia de Aristanis on.le Massimiliano de Seneen, s'Assessore a sa Cultura Serafino Corrias e sos responsàbiles de sos Ufìtzios cumpetentes de sa Provìntzia. Sunt istados cumbidados a partetzipare sos assessores e consigeris provintziales, sos Sìndigos, sos Amministradores, sos operadores de sos isportellos linguìsticos e sos dipendentes sos Comunes, sos dirigentes de sas iscolas mèdias de sa Provìntzia e totu sos espertos chi ant collaboradu a su progetu.

(italiano)