Logo della Provincia di Oristano

Provincia di Oristano - sito web ufficiale

Protocollu vatzinale pro assistèntzia a sos pròfugos ucrainos

05/04/2022  - 

Su Servìtziu Igiene e Sanidade pùblica de sa Asl de Aristanis at postu in funtzione su protocollu vatzinale destinadu a dare assistèntzia sanitària a sos pròfugos chi benint dae Ucraina, amparende a su matessi tempus sa gente dae sas maladias infetivas presentes in su territòriu dae in ue benint.

Su documentu disponet chi sos pròfugos fatzant unu tampone molecolare in antis de cale si siat tipu de vatzinu e chi in sos ufìtzios de sos raportos internatzionales Asl lis diant su còdighe STP, chi serbit pro otènnere assistèntzia sanitària, paris cun unu còdighe fiscale provisòriu chi at a permìtere de los registrare  in s’anàgrafe regionale de sos vatzinos.

Una borta otenta sa documentatzione, sos pròfugos ucrainos podent andare a su Tzentru vatzinale de su territòriu issoro (Aristanis, Abas, Terraba, Marrùbiu, Arborea, Bilartzi, Bosa, Cùglieri, Tramatza, Crabas, Simaghis, Nurachi e Samugheo) pro fàghere sos vatzinos obligados (contra a difterite, tètanu, tùssiu caninu, poliomielite, epatite B, haemophilus B, bermigiolu/morbillo, origrones, pigota rosa/rosolia, pigota burda/varicella).

In prus de sos vatzinos obligados, sos tzitadinos ucrainos sunt invitados finas a fàghere su vatzinu contra de su Covid: sunt a disponimentu (sena pagare nudda) sos vatzinos Pfitzer, Moderna e Novavax (chi est pro chie tenet prus de 18 annos e no at fatu ancora sa prima dose). Pro sos pitzinnos dae sos 5 a sos 11 annos est a disponimentu su vatzinu Pfitzer pediàtricu.

(GF.P.)