Logo della Provincia di Oristano

Provincia di Oristano - sito web ufficiale

Sa Die Internatzionale de sa Salude

06/04/2022  - 

Ogni annu su 7 de abrile si tzèlebrat sa Die Internatzionale de sa Salude. In su 1948 b’est istada sa prima Assemblea de s’Organizatzione Mundiale de sa Sanidade (OMS), chi at detzìdidu de istituire una die dedicada a sa salude in su mundu, cun sa punna de promòvere s’atentzione pro totu su chi pertocat sa situatzione sanitària in su mundu. Custa ricurrèntzia tenet ogni annu un’argumentu diferente chi pertocat sa salude pùblica e chi est un’impignu de traballu a favore de sa salude in totu su mundu: salude mentale, assistèntzia a sas mama e a sos pipios, diabete, bìvere in salude in sas tzitade, imbetzare in salude, …

S’OMS est impignadu a favore de unu mundu chi siat mègius e prus sanu ma fintzas unu mundu prus giustu ca sa salude est unu bene de totus ma in su mundu non totus tenent a disponimentu sos matessi servìtzios sanitàrios e fintzas sa salude dipendet dae in ue e comente si naschet, si creschet, si bivet, si traballat e s’imbetzat ca non est uguale in totue. B’at gente chi bivet in logos pagu seguros e pagu pulidos, sentza domo, sentza abba o sentza abba potàbile, in mesu a s’incuinamentu, sentza ite papare o ite papare no est sanu, malàidos e sentza si pòdere curare o b’est chie traballat sentza seguresa.

Fintzas a gherrare contra de su Covid-19 no est uguale in totue, b’at logos in ue sa gente est prus in dificultade e mancant sos servìtzios (vatzinos, dotores, ispidales, terapias intensivas,…) chi in aterue sarvant sa vida.

Sa salude est unu diritu pro totus, depet èssere unu bene de totus.

 (MM)