Logo della Provincia di Oristano

Provincia di Oristano - sito web ufficiale

Sa Die mundiale pro su giornalismu lìberu

02/05/2022  - 

Sa Die mundiale pro su giornalismu lìberu est istada proclamada su 3 de maju de su 1993 dae s’Assemblea Generale de sas Natziones Unidas. Sa ricurrèntzia, chèrrida e pedida dae s’UNESCO, naschet pro ammentare su seminàriu cuncordadu dae s’Unesco etotu – in  Namìbia in su 1991 – pro amparare s’indipendèntzia e sas boghes diferentes de s’imprenta e de su giornalismu africanu. In cussa ocasione est istadu aprontadu unu documentu, sa Decraratzione de Windhoek,  chi afirmat sos  printzìpios  in amparu de sa libertade de imprenta e de su giornalismu, de sas opiniones diferentes e de s’indipendèntzia de sos media chi sunt a fundamentu pro sa defensa de sa democratzia e de su respetu de sos diritos umanos.

Fintzas sa Decraratzione Universale de sos Diritos de sos Òmines, in s’artìculu 19, narat “Ogni persone tenet su diritu de sa libertade de espressare su parre suo e custu diritu est sa libertade, sentza interferèntzia peruna, de chircare, retzire e divulgare informatziones e ideas cun ogni mezu e sentza perunu lìmite”.

In su  mundu bi sunt, su prus in Àfrica e Àsia, 40 Paisos in ue su giornalismu no est lìberu.

Pro sa Die de su giornalismu lìberu, ogni annu, s’UNESCO cuncordat su prèmiu UNESCO/Guillermo Cano World Press Freedom Prize pro persones, organizatziones o istitutziones chi ant contribuidu a defensare sa  libertade de espressione de sos giornalistas e prus che totu pro s’atentu dadu in una situatzione de perìgulu. Su prèmiu esistit dae su 1997; in sa giuria bi sunt 14 giornalistas professionistas indipendentes.

Guillermo Cano Isaza fiat unu giornalista colombianu chi sos traficantes de droga, tocados dae sos artìculos suos, ant mortu in Bogotà, su 17 de nadale de su 1986, in foras de sa redatzione de su giornale suo.

Ogni annu, in ocasione de custa ricurrèntzia, s’UNESCO riunit  giornalistas professionistas chi traballant cun organizatziones pro su giornalismu lìberu pro valutare s’istadu de sa libertade in su giornalismu in totu su mundu e istudiare s’ite fàghere in ue custa libertade non b’est.

(MM)