Chenàbura 27 e sàbadu 28 de maju de su 2022 Aristanis at a ospitare su radunu mundiale de sos Zorro. S’initziativa est de s’Universidade de Aristan ghiada dae su regista aristanesu Filippo Martinez e su tema at a èssere “Sa Z est sa mia! Deo so Zorro!”
Giai in su 1983 e in su 2004 Aristanis aiat ospitadu su radunu mundiale de sos Zorro, e s’11 de abrile Filippo Martinez, retore de s’Universidade de Aristan, at torradu a fàghere s’apellu pro cunvocare a totus sos “Zorro” de su pianeta: “Zorro istimadu, as gherradu semper cun ànimu, trassa e ironia contra de s’arrogàntzia de sos potentes. Sa Z tua fiat signale de giustìtzia pro sos oprimidos, e como imbetzes Vladimir Putin, ponende·la in sos trastos suos de morte, l’at bortada a sìmbulu de brutalidade e de distrutzione. S’Universidade de Aristan chi, comente ischis, faghet cursos de Sièntzia de sa Felitzidade e de Preventzione de su Tropu Machine e assignat làureas in Teoria e Tècnicas pro Sarvare s’Umanidade, oe ti pedit de torrare a sa nòbile Z su significadu chi teniat a s’incomintzu. Nois t’isetamus”.
Sa risposta de Zorro no at istentadu a imbàtere: “Sa Z est sa mia! – at iscritu – Deo so Zorro, sa prus umana de sas giustìtzias divinas. E so a canta a imbàtere”.
E Aristanis s’est preparende a lu torrare a retzire.
(GF.P.)
