Logo della Provincia di Oristano

Provincia di Oristano - sito web ufficiale

Santa Maria de Candelas, sos Grèmios e su Mastru Componidori

04/02/2022  - 

Su 2 de freàrgiu, festa de Santa Maria de Candelas (La Candelora, in italianu) est una festa importante pro totu sos amantiosos de sa Sartiglia: est in custa die, difatis, chi sos grèmios dant s’incàrrigu a sos Componidores noos.

In àteros tempos sas massajas de su grèmiu nche leaiant a crèsia una loba de columbos, oe non si faghet prus ma est abarradu su signale de sa candela beneita mudada cun nastros e cun frores, chi si dat a su Componidori nou acabbada sa missa.

Ogni grèmiu tenet sa crèsia sua de riferimentu: sos massajos andant a sa cresiedda de Santu Juanni de frores, sos mastros de linna a sa sea (sa crèsia magiore).

Su Componidori (Mastru Componidore, comente narant in su bandu chi si dat in sas carreras de Aristanis sas dies de sa Sartìglia) est est sa figura prus de importu de sa Sartìglia: est su chi “cumponet”, chi indiritzat a sos àteros sighende sas règulas fissas chi ammentant su mundu de sos cavalieris antigos.

Su nùmene Componedor l’agatamus finas in s’Ensortilla, una manifestatzione ecuestre chi si faghet in s’ìsula ispagnola de Minorca. In ie, però, su chi li narant Componedor no est su “capo corsa” ma su giùighe de sa gara, s’àrbitru chi “cumponet” e faghet a manera chi totu andet bene. In sa Ensortilla de Minorca su “capo corsa” si narat Caixer Senyor. Est unu de sos nòbiles de sa tzitade (unu tempus finas in sa Sartìglia fiat gasi) e ispendet bona chedda de dinari pro sa manifestatzione e pro su bestire, chi si podet impreare non prus de duas bortas a fila a pare. Est issu chi sèberat sos cadderis pro sa carrelada.

E si in Sardigna s’òbligu de abarrare a caddu dae s’incomintzu a sa fine de sa gara lu tenet ebbia su Componidori, in Minorca lu tenent totu sos 120 cadderis chi non podent calare dae caddu finas chi sa manifestatzione no est finida (a sas 4 de mangianu, dae sas 2 de sero chi nch’aiant sètzidu!)

(GF.P.)