Logo della Provincia di Oristano

Provincia di Oristano - sito web ufficiale

Sos Grèmios

11/02/2022  - 

Sa paràula Grèmiu benit dae s’ispagnolu e inditat sas ‘corporatziones, cunfradias’, duncas assòtzios de gente chi faghet su matessi traballu. S’etimologia la cullegat a su latinu gremium (‘grembo’), cherende significare totu sos chi si reconnoschent in sa matessi coa, su matessi setore.

No ischimus in cale annu s’est detzìdidu de fàghere organizare sa Sartìglia a sos Grèmios.

Tenimus però documentos chi narant chi in su 1543 Giuanne (o Lenardu?) Dessì, canònigu de sa Sea (sa crèsia magiore) at dadu a su Grèmiu de sos Massajos unu terrinu suo pro chi dae s’incùngia esserent pagadu sas ispesas de sa Sartìglia e de sa chena pro sos cadderis.

Su canònigu Dessì ponet in craru chi, pro godire de sa lassa, in sa Sartìglia non bi devet àere violèntzia comente in àteras manifestatziones de cussu tipu. S’isetu de canònigu Dessì fiat de nd’istesiare sa gente dae sos tzilleris e dae su binu, càusa de brigas e de dannos.

A cussu tempus sa règula fiat chi a sas cursas de s’aneddu bi partetzipaiant sos nòbiles. Su pòpulu podiat cùrrere a puddas, cocas, gatos o angiones in sas dies de carrasegare ma li fiat proibidu de cùrrere a s’aneddu “ca custa est un’arte de Nòbiles e de Cavalieris” (Claude François Menestrier, Tratadu de sos Torneos, 1669). Imbetzes a sa Sartìglia bi podiat partetzipare finas gente de àteras classes sotziales e difatis sos chi aparteniant a sos Grèmios fiant massajos e traballadores de sa linna. In prus, bi leaiant parte finas sas fèminas, chi dae sos àteros torneos nche fiant esclùdidas.

Su Grèmiu de sos Massajos

De su Grèmiu de sos Massajos ischimus pagu e nudda: b’at documentos chi nd’atestant s’esistèntzia giai in su 1700, e verbales de nòmina de su presidente (s’Oberaju Majore) de sa segunda metade de s’Otighentos. Comente colore corporativu tenet su ruju.

Sa nòmina de s’Oberaju Majore si faghet su 24 de làmpadas, festa de su patronu santu Giuanne Batista.

Su Grèmiu de sos Mastros de linna

Tenet a protetores sos santos Giosepe e Luca. B’aparteniant totu sos chi traballaiant sa linna: mastros de carru, turneris, intalladores, chiterrajos, sos chi fraigaiant barcas e mòlinos, e totu sos artesanos de sa linna.

A colores corporativos tenent su colore de rosa e su colore de chelu. A su presidente li narant Majorali e lu nòminant su 19 de martzu, festa de su patronu santu Giosepe.

(GF.P.)