Sa Provìntzia de Aristanis, su Comune de Aristanis e su Comune de Crabas cuncordant unu laboratòriu pro prevènnere e connòschere mègius su diabete.
Su diabete, a dolu mannu, in provìntzia de Aristanis puru si presentat cun un’intzidèntzia e una prevalèntzia artas meda. Pro cussu sa Provìntzia de Aristanis, paris cun is Comunes de Aristanis e de Crabas, cuncordant unu laboratòriu in limba sarda pro prevènnere e connòschere mègius custa maladia, cunforma a una proposta de sa Cooperativa “L’altra cultura” chi faghet parte de su Catàlogu de laboratòrios in limba sarda de sa Regione Sardigna. De sa parte iscientìfica si nd’at a incurare dot.re Gianfranco Madau, mèigu diabetòlogu ispetzializadu fintzas in Iscièntzia de s’alimentatzione, mentras Antoni Nàtziu Garau, tradusidore-interprete e malàidu de diabete de genia 1 dae su 1997, si nd’at a incurare de sa parte linguìstica.
Sa faina at a tènnere una dura de 30 oras, partzidas in 15 addòbios de 2 oras onniunu, chi s’ant a fàghere intra de is meses de santugaine e onniasantu de su 2022. Su laboratòriu est gratis e, a s’acabbu, is dischentes ant a otènnere un’atestadu de frecuèntzia.
Is interessados si podent allistare compilende su mòdulu alliongiadu, chi bolet mandadu a s’indiritzu e-mail limbasarda@provincia.or.it a intro de su 20 de santugaine de su 2022 o cunsignadu a manu a s’Isportellu linguìsticu de sa Provìntzia, abertu dae su lunis a sa chenàbura, dae is noe de mangianu a sa una. Pro àteros informos faghet a telefonare a su nùmeru 349.6025986 o a mandare un’e-mail a s’indiritzu limbasarda@provincia.or.it.
Su laboratòriu s’at a pòdere incarrerare cun unu nùmeru mìnimu de 20 iscritos, chi s’impignant a ddu sighire pro a su mancus 21 oras de is 30 prevìdidas.
Manifesteddu laboratòriu in limba sarda
Mòdulu
