Su Distretu Biológicu regionali “Sardegna Bio” est su mellus d’Europa po su 2026. Su reconnoscimentu importanti dd’ant donau in Bruxelles, in sa Dì Europea de sa messarìtzia biológica, in s’àmbitu de is “EU Organic Awards”. Su prémiu, unu de is seti donaus in custa editzioni, dd’at prummóviu sa Commissioni Europea paris cun su Comitau Económicu e Sotziali Europeu, cun su Comitau Europeu de is Regionis, cun su Copa-Cogeca e cun su IFOAM Organics Europe.
Su Prémiu istituiu in su 2022, punnat a avalorai is mellus esperiéntzias europeas in su setori, in lìnia cun su Pianu de atzioni po s’isviluu de sa produtzioni biológica chi sa Commissioni Europea at adotau in su 2021.
“Sardegna Bio”, ùnicu distretu italianu lómpiu in finali, at sodigau su portoghesu “Alta Tâmega e Barroso e s’ispanniolu “Pla de Manlleu”. Un’acunsentimentu chi prémiat annus de trabballu, sa capatzidadi de fai retza e s’impénniu a donai una boxi comuna a su cumpartimentu biológicu isulanu, chi sighit a crésciri siat in produtzioni siat in consumus.
Sa Sardigna òcupat oi su de 6 postus in Itàlia po superfitzi destinadas a sa messarìtzia biológica. A ritirai su prémiu in su “Charlemagne Building “ de Bruxelles est istétiu su presidenti de su Distretu, Andrea Campurra, acumpangiau de su vitzepresidenti e de su presidenti de sa “Coldiretti” de Casteddu, Giorgio Demurtas, e de su diretori Aldo Buiani. Sa “Coldiretti” at agiudau sa nàscida de sa “Fondazione” in 2020. “Sardegna Bio” est su prus mannu distretu biológicu de s’Itàlia. Campurra chi tenit puru s’incàrrigu de Presidenti de sa “Rete Nazionale dei Distretti biologici” narat:«Sa fortza de custu Distretu est sa de ai donau una domu a chini, cun sacrifìtziu, at sémpiri crétiu in su biológicu in Sardigna. Fadeus scuadra, partitzipaus a is fieras internatzionalis e trabballaus a medas progetus paris cun alleaus diferentis, inclùdiu s’Assessorau regionali de s’Agricoltura”.
Agus: «Risurtau importanti po sa Sardigna”.
S’Assessori regionali de s’Agricoltura e Riforma Agru-pastorali, Francesco Agus, at espressau grandu satisfatzioni: «Est unu risurtau importanti po sa Sardigna e po is produtoris nostus. Est su reconnoscimentu de s’iscumissa a suba de su biológicu chi su cumpartimentu agrìcolu sardu e sa Regioni funt portendi a in antis impari. Unu risurtau chi si ispingit a sighiri in cust’istrada.
Po Giorgio Demurtas, su prémiu cunfirmat sa balididadi de su progetu chi “Coldiretti” at sémpiri agiudau: «Eus portau a Bruxelles unu modellu bincenti, chi est bonu a creai collabboratzionis tra is aziendas de su setori primàriu e cussa de sa trasformatzioni agru-alimentari, donendi valori e dinnidadi a su trabballu de is messajus».
Demurtas regordat puru su cuntribbutu de sa messarìtzia biológica a s’amparu de sa saludi e a sa biodiversidadi, a parti sa capatzidadi sua de fai bessiri is aziendas prus resistentis a is efetus de is cambiamentus climàticus. Narat issu: «In is mercaus de “Campagna Amica”, is prodotus biológicus cosa nosta ddus apretziant e ddus pedint sémpiri de prus. Sa bancarella de “Sardegna Bio” oramai est bessida unu puntu de riferimentu po is consumadoris». Su “Distretu” sardu fiat, paris cun sa tzitadi de Torinu, candidada in sa categoria “Miglior città biologica”, s’ùnicu rapresentanti de s’Itàlia tra totus is finalistas de is “EU Organic Awards 2026.
Fonti:https://sardegnanotizie24.it/sardegna-bio-e-il-miglior-distretto-biologico-deuropa/
