Su festival “Forestas insieme” arribat a Pau, in Monti Arci

Dettagli della notizia

Sàbudu 21 e domigu 22 de su mesi de onniasantu de su 2026

Data:

04 novembre 2026

S’Agentzia regionali Fo.Re.S.T.A.S. at cuncordau su festival “Forestas insieme – festival delle foreste – Un viaggio nel cuore verde della Sardegna” in logu abertu po scoberri is padentis sardus.

S’initziativa pinnigat tres coas de cida de custu mesi chi ant a serbiri, a is chi ndi ant a bolli pigai parti, a scoberri su patrimòniu naturalìsticu sardu, a fai atividadi sportiva e a fai laboratòrius didàticus a s’àiri, in mesu a sa natura.

Su festival at a tocai Seui (in su Montarbu su 7 e s’8), Patada (in Monti Lerno su 14 e 15) e Pau (in Monti Arci su 21 e 22).

Me in is giorronadas de sàbudu is fainas ant a essi asuba de seminàrius e ammostas, mentras is domigus ant a serbiri a is passilladas, a su sport e a su benèssiri a s’àiri, s’at a fai:

- “trekking” e caminadas ghiadas in mesu a padentis de ìlixi e suèrgiu secularis, sighendi moris chi andant beni siat po genti pràtica de diora siat po cussa chi no est pràtica po nudda;

- bicicreta po monti me in is moris de is padentis;

- benèssiri e assusegu, cun yoga e meditatzioni a s’àiri po agatai s’echilìbriu in mesu a sa natura;

- tiru cun s’arcu e fainas in s’àcua, ma custas ùrtimas sceti in Monti Lerno.

Totu is initziativas funt a indonu, ma tocat de s’allistai in antis in s’arretza po assegurai respetu de is postus a disponimentu e sa seguresa de is fainas.

Ònnia prenotatzioni ballit po una personi sceti.

Po cali si siat informu e po s’allistai o annuddai s’allistradura tocat a impreai in s’arretza su programma: forestasinsieme.simplybook.it/v2/

 

Po su chi pertocat Monti Arci, su programma ponit in contu:

Sàbudu 21, a is 4 de merii in su Tzentru Polifuntzionali de su Comunu de Mragaxori, cunvènniu “Foresta e lavoro: filiere sostenibili e servizio ecosistemici”, asuba de is fainas de produtzioni vivaìstica forestali e valorizamentu de sa flora sarda, ant a chistionai Valeria Soru, Maurizio Malloci, Angela Porcu, Sara Maltoni, Antonio Vinci e Maurizio Fois. A s’acabbu s’ammosta e laboratòriu “Catalogo vivo” de is spècias de sa flora sarda e ammostu de is pràticas de sèmina.

Domigu 22, giorronada in padenti, in su Presìdiu forestali Monti Arci.

S’at a inghitzai a is 9 oras de mangianu in Pau po lassai is veturas e movi a naveta conca a Sennixeddu. Totu su mangianu s’at a podi bisitai su “Bosco da fiaba”, is mesas chi ammostant is fainas de FORESTAS, anca si podint tastai finas is produtus de su territòriu, s’at a podi fai “trekking”, tiru cun s’arcu, yoga, laboratòrius didàticus e ambientalis po pipius e mannus.

A is 3 de merii nci at a essi su cuncertu de su coru Tenores de Forestas.

A is 4 e mesu acabbat totu e apustis de ai arregortu s’àliga, si torrat a Pau.

Programma in Pau
Programma in Pau

Ultimo aggiornamento: 04/11/2026, 11:15