Apustis de su pausu de s’istadi, torrat “Monumenti Aperti”, s’initziativa culturali chi fait connosci, a indonu, su patrimòniu artìsticu, architetònicu, archeològicu e non sceti, de is biddas e tzitadis, sardas e no, chi ndi ant bòfiu pigai parti.
Arribau ocannu a sa de 30 editzionis, est inghitzau su 18 de aprili in Casteddu e acabbat sa primu coa de cida de su mesi chi intrat, tochendi, immui, in sa provìntzia de Aristanis sa bidda de Mòguru su 10 e s’11 e sa bidda de Ardaule su 17 e 18.
In Mògoru at a essi s’ocasioni de abisitai, cun sa ghia de is piciocheddus de scola e cun is cunfraras de is Cunfrarias de s’Arrosàriu e de su Santissimu Sacramentu (in logu de crèsia), su Nuraxi de Cucurada, faci a sa 131, su Nuraxi Su Cunventu cun Is Camineras (bias e moris chi de sa bidda portant a su sartu e dda atravessant), sa crèsia parrochiali de Santu Bernardinu, sa crèsia de su Crammu, sa crèsia de Sant’Antiogu, sa mosta potogràfica a s’abertu totu cantu andant is bias de sa bidda.
Is bìsitas inghitzant a is 9 oras e mesu de mangianu finas a is mesudii e mesu e torrant a atacai a is 4 de merii finas a is 7. In crèsia non s’ant a podi fai candu ddui ant a essi is funtzionis religiosas.